Ana səhifə BAŞ YAZI Bir uçan bulaqdı göydə hər bulud…

Bir uçan bulaqdı göydə hər bulud…

Müəllif: Bizim Yazı
323 baxış

YUSİF GÜNAYDIN. Yeni şeirlər

UCA BULUDLAR

Buludlar ağlamasa, yaşıllıqlar necə gülər?
                                                 Mövlanə

Yenə də göyləri ram edib sükut,
Sükutu dinləyən göylər uludur.
Bir uçan bulaqdı göydə hər bulud,
Hər uca buludun canı suludur.

 

Sanki borc götürüb suyu haçaqdır,
Buludlar dolaşır üfüqlər boyu.
Yerə zamanında qaytaracaqdır
Bir zaman canına çəkdiyi suyu.

Bu haqqın hökmüdür, hikmət anıdır,
Solğun vadilərə həyəcan verən.
Su dövranı ərzin qan dövranıdır,
Odur çevrəmizə həyat, can verən!

SÜNBÜL
                Aynura

Dedin bu hörüyün sünbüldür adı,
Hansı əllər hörüb sünbülü belə?
Bağrım tel-tel oldu, çarəm qalmadı,
Ürəkdən bağlandım belə sünbülə.

Bənd olub bağlandım Məcnunsayağı,
Düşdü gözlərimdən çiçək də, gül də.
Bu müdhiş cazibə hardandır axı,
O qızıl kirpikli zərif sünbüldə?

ELEGİYA

Bu da sonu… Bir xam, ürkək ahunun,
Ahı qaldı bu sevdanın sonunda.
Nəşə dolu şirin xülya çəkildi,
Ağu qaldı bu sevdanın sonunda.

Məst olduqca nəvasına bu eşqin,
Qüssə sızdı havasına bu eşqin.
Yığış indi gəl yasına bu eşqin –
Ağı qaldı bu sevdanın sonunda.

Son sətirlər bir son bahar nəfəsi,
Sual işarəsi, nida kəlməsi?
Qu quşu naləsi, vida nəğməsi
“Quq-quu” qaldı bu sevdanın sonunda…
04.02.2016

You may also like

Şərh yaz

Layihə haqqında

Sayt Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə hazırlanmışdır.

Saytın məzmunu

Saytın məzmunu DGTYB İctimai Birliyinin cavabdehliyindədir, bu baxımdan saytın məzmunu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin mövqeyini əks etdirmir.

Bizim Yazı ©2022 – Bütün hüquqları qorunur.