Azərbaycan Yazıçılar Birliyi Sumqayıt bölməsinin, Əli Kərim adına Sumqayıt şəhər Poeziya Klubunun təşkilatçılığı ilə ustad şair Məmməd İlqarın 75 illik yubileyinə həsr olunmuş ədəbi-bədii gecə keçiriləcək.
Bizimyazı.az xəbər verir ki, tədbir 15 mart 2025-ci il tarixdə, saat 15:00-da Sumqayıt şəhər Poeziya Evində baş tutacaq.
Giriş sərbəstdir.
Qardaş Qazaxıstanın yeni nəsil şairlərindən Sayat Kamşıgerin “Qarabağ” poeması Bakıda – “CN-Poliqraf”da gün üzü görüb. (İSBN: 978-9952-013-79-5).
Xəzərin o tayındakı qardaşımızın “Qarabağ”ı yazması, poemanın Qazaxıstan mətbuatında yayınlanması, Azərbaycanda kitablaşdırılması Qazax-Azərbaycan ədəbi-mədəni bağlarına ydni bir töhfədir. Bu işin məzmunu və səciyyəsi ümumən Türk dünyasının mədəni və ədəbi bağlarına töhfə dəyərindədir.
“Regional Hüquqi və İqtisadi Maarifləndirmə” İctimai Birliyi (RHİMİB) ilə Dünya Gənc Türk Yazarlar Birliyinin (DGTYB) birgə təşəbbüsü ilə ərsəyə gələn bu kitab, Qazaxıstan-Azərbaycan dostluğunun, qardaşlığının poetik təcəssümüdür.
Azərbaycanın milli tarixini, Qarabağın qurtuluş və qürur yolunu, şəhidlərimizin qəhrəmanlığını, eləcə də, türk birliyini tərənnüm edən bu poemahəm də, hiss və duyğuların poetik toplusudur. Sayat Kamşıger, DGTYB-nin dəvəti ilə Azərbaycana səfəri zamanı Qarabağ (ümumən Azərbaycan) həqiqətləri ilə yaxından tanış olub, sonra bu mövzuda bir əsər yazacağına dair vədini yerinə yetirərək, “Qarabağ” poemasını qələmə alıb.
Əsərin Azərbaycan dilinə uyğunlaşdırılmasını tanınmış şair-publisist Elşən Əzim, redaktəsini isə Prof.Dr. Rəsmiyyə Sabir həyata keçirib. Layihənin rəhbəri, Qazaxıstanın Uluslararası “Alaş” Ədəbi Mükafatının laureatı Əkbər Qoşalı, önsöz müəllifi RHİMİB başqanı Arzu Bağırova, rəyçilər DGTYB başqanı İntiqam Yaşar ilə Tariyel Əhmədov, koordinatorlar Nilufər Lətif və Etibar Muradxanlı, dizayneri Cəsarət Qasımovdur.
Yaradıcı heyət kitabın, Qarabağın tarixi, mədəniyyəti və qurtuluş yolunu oxuculara çatdırmaqla yanaşı, Qazaxıstan və Azərbaycan arasında ədəbi, mədəni-mənəvi bağların güclənməsinə töhfə verəcəyinə inanır.
Yenicə gün üzü görən, Azərbaycan və qazax oxucuları arasında rəğbət qazanacağına inanılan “Qarabağ”ın Azərbaycanda və Qazaxıstanda tanıtımı nəzərdə tutulub.
Bu günlərdə gənc yazıçı Gülay Əsgərlinin ilk kitabı işıq üzü görüb. “Mənimlə danış” adlı 27 hekayədən ibarət olan bu kitab “CBS” nəşriyyatı tərəfindən nəşr edilib. Kitabın redaktoru professor Həcər Hüseynova, ön sözün müəllifi isə filologiya üzrə fəlsəfə doktoru Qənirə Əmircanovadır. Kitaba daxil edilmiş hekayələr müəllifin məktəb illərində yazdığı ilk qələm təcrübələrindəndir. Kitabda yer alan hekayələrin mövzusu müxtəlifliyi və qeyri-standart yanaşma tərzi ilə seçilir.
Qeyd edək ki, gənc yazıçı 2024-cü ildə Bakı şəhərində 28 saylı tam orta məktəbi qırmızı attestatla başa vuraraq, 650 balla Bakı Dövlət Universitetinə daxil olub. Hazırda həmin universitetin “Beynəlxalq münasibətlər və iqtisadiyyat” fakültəsinin “Dövlət və ictimai münasibətlər” ixtisasının (tədris ingilis dilində) I kurs tələbəsidir.
Bədii yaradıcılıqla 10 yaşından etibarən məşğul olur. Şeirləri, hekayələri və esseləri dövri mətbuatda çap olunub. Azərbaycan Televiziya və Radio Verilişləri Qapalı Səhmdar Cəmiyyətinin 2023-cü ildə 16 yaşa qədər məktəblilər arasında keçirdiyi II şeir, hekayə və esse müsabiqəsində “Balaca oğru” hekayəsinə görə 1-ci yerə layiq görülüb. 2022-ci ildə Azərbaycan Respublikası Təhsil Nazirliyi tərəfindən keçirilən “Əziz Şuşa, sən azadsan!” inşa müsabiqəsində 2-ci yerə layiq görülüb.
Cəfər Cabbarlı adına Respublika Gənclər Kitabxanasında şair, yazıçı, tərcüməçi, ssenarist, Azərbaycan Yazıçılar Birliyinin üzvü Xanım Aydının nəzm və nəsr nümunələrindən ibarət “İkimiz” və “Çamadan” kitablarının təqdimat mərasimi keçirilib. Təqdimatda Əməkdar incəsənət xadimi, “Azərbaycan” jurnalının baş redaktoru tənqidçi, tərcüməçi İntiqam Qasımzadə, Azərbaycanın əməkdar jurnalisti, yazıçı, jurnalist, tarixi romanların müəllifi Yunus Oğuz, “Ulduz” jurnalının baş redaktoru Qulu Ağsəs, Əməkdar jurnalist, yazıçı-publisist, pedaqogika üzrə fəlsəfə doktoru Zemfira Məhərrəmli, Azərbaycan Ədəbiyyat Fondunun Baş direktoru, Azərbaycan Yazıçılar Birliyi İdarə Heyətinin üzvü, Avrasiya Millətlər Assambleyası Ədəbiyyat Şurasının həmsədri Varis Yolçuyev, Azərbaycan Prezidentinin İşlər İdarəsinin siyasi sənədlər arxivinin şöbə müdiri Lamiyə Həsənova, Azərbaycan Respublikası “Xatirə kitabı” redaksiyasının baş redaktoru, şairə Nəzakət Məmmədova, “Azərbaycan” jurnalının Baş redaktor müavini Südabə Ağabalayeva, filologiya üzrə fəlsəfə doktoru, dosent, yazıçı-publisist Şərəf Cəlilli, sənətşünaslıq üzrə fəlsəfə doktoru Fəxriyyə Lilpar, AzTV-nin əməkdaşı, yazıçı-publisist Təranə Bakirqızı, kitabxana əməkdaşları və başqaları iştirak etdilər.
Tədbiri giriş sözü ilə açan kitabxananın direktoru Aslan Cəfərov qonaqları salamlayaraq, bu gün kitabxananın Xanım Aydının kitab təqdimatına ev sahibliyi etməsindən böyük məmnunluq duyduğunu dilə gətirərək onun yaradıcılıq nümunələrində olan səmimiyyətdən, insanın ən dərin, həssas duyğularını dilə gətirən poetik dünyasından söz açaraq, əsərlərini böyük sevgi ilə yazıldığını və çox maraqlı üsluba malik olduğunu bildirdi.
Azərbaycan Ədəbiyyat Fondunun Baş direktoru Varis Yolçuyev Xanım Aydının geniş və çoxşaxəli yaradıcılığı haqqında danışaraq, Xanımın eyni zamanda bədii tərcüməçilik sahəsində də kifayət qədər dəyərli və dərin məzmunlu əsərləri Azərbaycan dilinə tərcümə etdiyini, eyni zamanda uğurlu kino ssenarilərin müəllifi olduğunu da söylədi.
Əməkdar incəsənət xadimi İntiqam Qasımzadə Xanım Aydının “Şair təbiətli nasir” olduğunu söyləyərək, onun “Sərçə”, “Rəngbərəng kəpənəklər” hekayələrində hər bir oxucunun qəlbini riqqətə gətirəcək həssas məqamlara toxunduğunu bildirdi. Uzun illər müəllif ilə əməkdaşlıq etdiyini söyləyərək, onun bir çox əsərlərini redaktə etdiyini də dilə gətirdi.
Əməkdar jurnalist Zemfira Məhərrəmli müəllif ilə ilk tanışlığının “Ulduz” jurnalının redaksiya heyətinin təşkil etdiyi “Yazı masası” rubrikası çərçivəsində olduğunu yada salaraq, Xanım Aydının şeirlərinin bitkin nəzm nümunələri olduğunu bildirdi.
Yazıçı Yunus Oğuz ədəbiyyatda poeziya nümunələrinin bir anlıq dərin hisslər fonunda yaratdığını nəsr əsərlərinin isə uzunmüddətli əməyin nəticəsi olduğunu bildirdi. Yunus Oğuz müəllifin “Torpaq” şeirinin təhlilini apararaq bu əsərin dərin poetik, romantik və eyni zamanda da “Yaradılış” mövzusuna həsr olunduğunu dilə gətirdi.
“Ulduz” jurnalının Baş redaktoru, şair Qulu Ağsəs ədəbiyyat mühitində gənc şair və yazarlar üçün yaradılan yaradıcılıq imkanlarından danışaraq, Xanım Aydın ilə uzun illərə arxalanan dostluq münasibətləri və həmkar fəaliyyətindən söhbət açdı. Xanım Aydının qələmə aldığı istər şeirlərində, istərsə də hekayələrində Vətənə sevgi, yurda, torpağa bağlılıq, ana, övlad, ailə motivlərinin yüksək peşəkarlıq və istedad ilə təsvir edildiyini söylədi.
Filologiya üzrə fəlsəfə doktoru, dosent, yazıçı-publisist Şərəf Cəlilli müəllifin yaradıcılıq işığına toplanmış ədəbiyyat, mətbuat nümayəndələrinin söylədiyi dəyərli fikirlərə qoşularaq, Xanım Aydının istər peşəkar jurnalistika, istər yaradıcılıq istərsə də tərcüməçilik fəaliyyətində əsl fədakarlıq nümunəsi olduğunu, gözəl həmkar olmaqla yanaşı, əsl Azərbaycan xanımına xas olan ana, qadın obrazını da çox uğurla canlandırdığını bildirdi.
Azərbaycan Prezidentinin İşlər İdarəsinin siyasi sənədlər arxivinin şöbə müdiri Lamiyə Həsənova, Respublika “Xatirə Kitabı” Redaksiyasının Baş redaktoru Nəzakət Məmmədova, “Azərbaycan” jurnalının Baş redaktor müavini Südabə Ağabalayeva, sənətşünaslıq üzrə fəlsəfə doktoru Fəxriyyə Lilpar, AzTV-nin əməkdaşı, yazıçı-publisist Təranə Bakirqızı və digər tədbir iştirakçıları Xanım Aydının bir yazıçı, şair, tərcüməçi, ssenarist, sevilən mahnıların söz müəllifi kimi uğurlu fəaliyyətindən danışaraq, müəllifə gələcək işlərində uğurlar arzu etdilər.
Yazıçı Xanım Aydın müəllifi olduğu “Sərçə” hekayəsinin avtobioqrafik əsər olduğunu söyləyərək, yazarın qələmə aldığı mövzunu dərindən bilməsi, bütün qəlbi ilə duyması əhəmiyyətindən danışaraq, “İkimiz” və “Çamadan” kitablarının təqdimat mərasimini mərhum atasının əziz xatirəsinə ithaf etdiyini söylədi.
Sonda müəllif Xanım Aydın kitablarını Cəfər Cabbarlı adına Respublika Gənclər Kitabxanasına hədiyyə etdi və tədbirin təşkilinə görə əməyi keçən hər bir kəsə öz dərin təşəkkürünü bildirdi.
Milli Məclisin Mədəniyyət Komitəsinin sədri, Azərbaycanın və Özbəkistanın Xalq artisti, professor Polad Bülbüloğlu, dövlət qeydiyyatına alınmasının 25-ci ildönümünü qeyd edən Dünya Gənc Türk Yazarlar Birliyi (DGTYB) İdarə heyətinə məktub ünvanlayıb.
Dünyaşöhrətli sənətkarın təbrik məktubunda deyilir:
“Hörmətli DGTYB İdarə heyəti üzvləri,
Azərbaycanın türk ölkə və topluluqları ilə ədəbi-mədəni bağlarının inkişafında xidmətləri ilə seçilən Birliyiniz özünün 25 illik əlamətdar yubileyini qeyd edir. Bu münasibətlə sizi, sizin timsalınızda DGTYB seçkili orqanlarını və bütün üzvlərini təbrik edir, ən xoş diləklərimizi yetirirəm!
Mən Azərbaycanın Mədəniyyət naziri və TÜRKSOY başqanı olarkən, DGTYB-nin quruculuğunun ilk illəri idi və bizim də öz tərəfimizdən Birliyin fəaliyyətinin güclənməsinə dəstək göstərdiyimizi məmnuniyyətlə xatırlayıram. Çox şadam ki, ötən illər içində DGTYB daha da püxtələşib, Birliyin sıralarından Azərbaycanda və Türk dünyasında tanınmış imzalar çıxıb. DGTYB Türk dünyası ədəbi gəncliyinin bir-biri ilə yaxından bağlar qurmasında, Azərbaycan ədəbiyyatının qardaş ölkə və topluluqlarda, qardaş ölkələr ədəbiyyatının Azərbaycanda tanıdılmasında önəmli bir platformadır. Birliyiniz, ədəbi fəaliyyətlə yanaşı, Azərbaycan həqiqətlərinin ölkə sınırlarından qıraqda təbliğ və tərənnüm edilməsində də önəmli işlər görüb.
DGTYB-nin Milli Məclisin Mədəniyyət Komitəsi ilə sıx əməkdaşlığının davam və inkişaf edəcəyinə, öz uğurlarınızla toplumumuza, ədəbiyyatımza, mədəniyyətimizə, incəsənətimizə bundan sonra da töhfələr verəcəyinizə inanıram.
DGTYB-ni 25 illik yubileyi ilə bağlı Azərbaycan Respublikası Milli Məclisinin Mədəniyyət Komitəsi adından bir daha təbrik edir, Birliyin bütün üzvlərinə möhkəm cansağlığı, yaradıcılıqda və ictimai həyatda yeni uğurlar diləyirəm”!
Onu da vurğulayaq ki, bu, Xalq artisti Polad Bülbüloğlunun Mədəniyyət Komitəsinin sədri olaraq bir ictimai birliyə ünvanladığı ilk təbrik məktubu olma özəlliyi daşıyır.
Qeyd edək ki, DGTYB oktyabrın 4-də (saat 14:30) AMEA Mərkəzi Elmi Kitabxanasının “Şuşa” zalında 25 illik yubiley törəni,oktyabrın 5-də (saat 15:00) Sosial Tədqiqatlar Mərkəzinin konfrans salonunda – Türk dünyası gənc yazarlarının I Bakı Forumu,oktyabrın 6-da (saat 14.00-15.00) isə X Bakı Beynəlxalq Kitab Sərgisi çərçivəsində – “Bakı Ekspo Mərkəz”də (“GREEN ZONE”) Qazaxıstanın Əməkdar Mədəniyyət xadimi, şair Dəuletkerey Kəpoğlunun “Üşüyən küçələr” kitabının tanıtım törənini keçirəcək.
