Ana səhifə YAZILAR Qoyma, gözlər doluxsun…

Qoyma, gözlər doluxsun…

Müəllif: Bizim Yazı
1. 394 baxış

BizimYAZI.com Azərbaycan Silahlı Qüvvələrinin giziri Zaur SAHİLin yeni şeirlərini təqdim edir:

***
Ruhumuz Tanrıdan alıb gücünü,
Torpağın canından qoparır bizi.
Ölüm canımıza salıb özünü,
Təzədən torpağa aparır bizi…

 

Hər gün başımızın saçı tökülür,
Düşür, o dünyaya yol olmaq üçün…
Hər gün bu dünyadan bir insan köçür,
Gedir, o dünyada doğulmaq üçün…
                                                23.09.2013

A dağlar qızı

İlhamın izinə düşəndən bəri,
Səddi bilinməyir, a dağlar qızı.
İndi ürəyimdən keçən arzunun,
Həddi bilinməyir, a dağlar qızı.

Özüm öz saçımda dən olmuşam mən,
Özümdən çıxaraq sən olmuşam mən.
Hər dərdi qadanı mən almışam mən,
Qəddim əyilməyib, a dağlar qızı.

Getmək istəmirəm… bu gün sabaha,
Bir istək içimdə batıb günaha…
Yaşamaq mənimçün ayıbdı daha,
Şərtim deyilməyib, a dağlar qızı.
13.04.2013

Sevincim

Qaya kimi titrəməyi var idi,
Yollar kimi büdrəməyi var idi.
Hər arzuma, istəyimə yar idi,
Daşıb birdən selə döndü sevincim,
Qəfil əsən yelə döndü sevincim.

Mən sayanı o nədənsə saymadı,
Ürəyimdə yanan eşqi duymadı.
Sevgisini mənə yaxın qoymadı,
Çıxıb getdi, ilə döndü sevincim,
Qəfil əsən yelə döndü sevincim.

Məndən ayrı bağçalara qondu, o..!
Tikan üstə buz bağlayıb dondu, o..!
Birdən birə alışaraq yandı, o..!
Yanıb, yanıb külə döndü sevincim,
Qəfil əsən yelə döndü sevincim…
2013

Saxla görüm

Ay, bizi havalı edən,
Dumanı saxla görüm.
Ucuzu bahalı edən,
Zamanı saxla görüm.

Əl qıranın əlindən,
Səhv deyənin dilindən,
İnsanın əməlindən,
Yamanı saxla görüm.

Qoyma, güllər soluxsun,
Qoyma, gözlər doluxsun,
Qoyma, kimsə darıxsın,
Gümanı saxla görüm.
31.01.2013

You may also like

1 şərh

Kənan AYDINOĞLU 2013-09-30 - 21:00

Salam, Əziz və hörmətli şair dostum Zaur qardaşım! Fəxri üzvü olduğunuz Azərbaycanın Mədəniyyət və Ədəbiyyat Portalının Redaksiya, Yaradıcı, Nümayəndə Heyətlərinin üzvləri adından sizə ədəbi-bədii yaradıcılığınızda bol-bol uğurlar diləyirəm.

Cavab

Şərh yaz

Layihə haqqında

Sayt Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə hazırlanmışdır.

Saytın məzmunu

 

Saytın məzmunu DGTYB İctimai Birliyinin cavabdehliyindədir, bu baxımdan saytın məzmunu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin mövqeyini əks etdirmir.

Bizim Yazı ©2022 – Bütün hüquqları qorunur.