ÖMÜRmü söyləyim, CƏZAmı deyim?!.

Namiq HACIHEYDƏRLİ

SƏNİN

Sənə qədər deyim, qəzamı deyim?
Kim qurdu bu oynu, nizamı deyim…
Ömürmü söyləyim, cəzamı deyim,
Nə gördüm bu sirli köçündə sənin?!

Çeşid-çeşid dərd bitirən zəmisən,
Bəxtəvər eylədin söylə kimi sən?!
Alovdan qaralan təndir kimisən,
Alışıb yanıram içində sənin.

Doğrular yerimir, yalan ağladır,
Nadan əzab verir, bilən ağladır.
Doğulan ağlayır, ölən ağladır;
Bir şeydi gəlişin, köçün də sənin.

Səni dəyişmədi peyğəmbər, nə din,
Şərə boyun əydin, iblisə yendin…
Dünya!
Nə zamandı, bu necə gündü;
İtibdi mizanın, ölçün də sənin…

Yolumda yel əsdi, sellər çağladı,
Sevincə vardıqca, qəm qabaqladı.
Üzüm güləndə də içim ağladı,
Varın da nağılmış, heçin də sənin…

Ömürmü söyləyim, cəzamı deyim,
Nə gördüm bu sirli köçündə sənin?!

12.08.2011

SƏNİ NECƏ SEVMƏYİM?!

Zaman rastlaşdımı sən tək birinə?!
Sözdən deyil, gözdən anladın məni.
Yanlışım olanda qınaq yerinə,
Məsum bir baxışla danladın məni;
Səni necə sevməyim?!

Barmağım ağrısa, qəlbin sızladı,
Kövrək anlarımda doldu gözlərin…
Xəstə günlərimdə dərmandan qabaq,
Məlhəmə çevrildi şirin sözlərin.
Səni necə sevməyim?!

Sən mənə, mən sənə könül verəli,
Yoluma nur saçan çırağım oldun.
Qohumdan, qardaşdan, dostdan irəli,
Sirdaşa çevrildin, dayağım oldun.
Səni necə sevməyim?!

iyul 2011

MİLLİ KİMLİK

-Adın nə?
-Sədrəddin!
-Atanın adı?
-Bədrəddin!
-Soyadın?
-Kəlbiyev!
-Ərəbmisən?
-Türkəm! Niyə ərəb olum?!
-Adın ərəb, soyadın ərəb, atanın adı ərəb
Rusca doğuldun, ingiliscə yaşarsan,
ərəbcə öləcəksən…
Türklüyün harda qaldı?

-Adın nə?
-Elxan!
-Atanın adı?
-Oğuz!
-Soyadın?
-Ərsoy!
-Milliyətini sormaya gərək yox.
Türk olduğun adından bəlli…
…millət öz keçmişini,
hələ daşlayır bala.
Milli kimlik soyaddan
addan başlayır bala…

28.07.2011