Ana səhifə KateqoriyasızƏDƏBİYYAT Türkiyədə “Elçinə ərməğan” adlı kitab nəşr edilib

Türkiyədə “Elçinə ərməğan” adlı kitab nəşr edilib

Müəllif: Bizim Yazı
413 baxış

Türkiyədə “Elçinə ərməğan” adlı kitab nəşr edilib.

Xalq yazıçısı Elçinin 80 illik yubileyi münasibəti ilə Türkiyənin “Bengü” nəşriyyatında “Elçinə ərməğan” adlı kitab çap olunub. Nəşrdə görkəmli yazıçının həyat və yaradıcılığı, ictimai və ədəbi fəaliyyəti haqqında məqalələr toplanıb. Kitabın Ön sözünü Avrasiya Yazarlar Birliyinin sədri Yaqub Öməroğlu qələmə alıb.

Üç hissədən ibarət toplunun birinci hissəsi “Elçinə dair” adlanır. Həmin hissədə yer alan Mir Cəlal, Bəxtiyar Vahabzadə, İsa Həbibbəyli, Məryəm Əlizadə və Abid Tahirlinin məqalələrində Xalq yazıçısının Azərbaycan və dünya mədəniyyətində, ədəbiyyatında, habelə teatrındakı xidmətləri yüksək qiymətləndirilir.

İkinci hissə “Elçinin roman yaradıclığı” adlanır. Bu hissədə tanınmış türk yazar və ədəbiyyatşünasların – Bilge Ercilasun, Alev Sınar Uğurlu, Mehdi Gəncəli, Furkan Abir, Canan Olpak Koç, Sedat Adıgüzel, Dinçer Atay, Yağmur Söğüt, Nihan Abir, Ezgi Karslı və Cem Sevincin məqalələrində Elçinin “Mahmud və Məryəm”, “Ağ dəvə”, “Ölüm hökmü”, “Baş” romanları elmi və ədəbi baxımdan təhlil edilir.

“Elçinin hekayə yaradıcılığı” adlanan Üçüncü hissədə isə Türkiyənin tanınmış qələm adamlarının – Aliyə Uslu Üsten, Beyhan Kanter, Onur Belli, Fatih Kanter, Salim Çonoğlu, Metin Savaş, Suna Özcan, Mine Nihan Doğan, Oğuzhan Karaburgunun məqalələri toplanıb. Həmin yazılarda Elçinin hekayə yaradıcılığı dünya ədəbiyyatı kontekstində şərh edilir.

Kitabın sonunda Xalq yazıçısının uşaqlıq, gənclik illərini əks etdirən fotoları ilə yanaşı, Ulu öndər Heydər Əliyev, Azərbaycan Respublikası prezidenti İlham Əliyev, Türkiyə Cümhuriyyətinin prezidenti Rəcəb Tayyib Ərdoğan, Türkiyənin eks-prezidenti Süleyman Dəmirəl, Azərbaycan və Türk ədəbiyyatının görkəmli simaları İlyas Əfəndiyev, Yaşar Kamal, Cavad Heyət, Yaşar Qarayev və başqaları ilə çəkilmiş bir-birindən maraqlı fotoları yer alıb.

Kitabın redaktorları Salim Çonoğlu, Mehdi Gəncəli, Yasin Yavuz və Çem Sevincdir.

You may also like

Şərh yaz

Layihə haqqında

Sayt Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə hazırlanmışdır.

Saytın məzmunu

 

Saytın məzmunu DGTYB İctimai Birliyinin cavabdehliyindədir, bu baxımdan saytın məzmunu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin mövqeyini əks etdirmir.

Bizim Yazı ©2022 – Bütün hüquqları qorunur.