“Ay işığı” Ədəbi Məclisinin başqanı şair Ramiz Qusarçaylının verdiyi bilgiyə görə, Quba ədəbi mühitinə ağır itki üz verib. – Dəyərli şair İzmirağa Töhmərli bugün dünyasını dəyişib. Mərhum şairin Tanrı rəhmətinə qovuşmasını diləyir, yaxınlarına, oxucularına və qələm yoldaşlarına başsağlığı veririk!
İzmirağa Töhmərlinin iki şeirini “BizimYAZI” oxucularına sunuruq:
Oynayırsan
Mizrab taqətdən düşüb,
Sim çalır, oynayırsan.
Sənin öz havan yoxdur
Kim çalır, oynayırsan.
… Nə deyim sənə qarşı,
Sevirəm zatən marşı…
Orkestr matəm marşı,-
Himn çalır, oynayırsan.
Fərqi yox rus, çex olsun,
Əl çalanın çox olsun,
Conson, Smit, Kox olsun…
Cim çalır, oynayırsan.
Sərsərisən, veyilsən,
Elə “Çalın!”_deyirsən,
Öz ağlında deyilsən,-
Cin çalır, oynayırsan…
Dünya xəritəsi
Bir vaxt nəhəng dövlət idik,
Oldu talan torpağımız.
Cənab Babək… Koroğlu bəy,
hanı qalan torpağımız?!.
Görən, BMT bilirmi? –
Dünya xəritəsi saxtadır.
Doymadı yerdən insanlar,
Nəfsi Aya, Marsa düşdü;
Pay-puş oldu Azərbaycan,
çox hissəsi farsa düşdü.
Dünya dağılmalı idi –
Haqq-ədalət, insaf varsa!..
Allah bizi möhtac etmə –
ermənin dostu farsa…
Təzə-tər dərə bilmədim,
gözüm solan güldə qaldı…
Samurdan sərhəd çəkdilər,
Dərbənd bizdən çöldə qaldı.
Canım Dərbənd, gözüm Dərbənd,
Dünya xər itəsi saxtadır!..
Dünya sökülür içindən
Qəmli-qəmli acı-acı,
Oyunlarda bir adətdir
“NATO” qardaş, “ATƏT” bacı,
Sökün bu dünyanı təzədən yığın
Dünya xəritəsi saxtadır…
