Ana səhifə YAZILAR Afət VİLƏŞSOYdan iki təzə şeir

Afət VİLƏŞSOYdan iki təzə şeir

Müəllif: Bizim Yazı
104 baxış

A.VileshsoyBöyükdü

Çəkə bilməz göylər yeri,
Əlindəki ağır yükdü.
Nəqqaş naşı, qismət zalım,
Naxış həvədən böyükdü.

Vuranı davadan etdi,
Ciyəri havadan etdi;
İlanı yuvadan etdi,
İlan yuvadan böyükdü.

 

Bəxti damdı, bəxti sızdı,
Udaram deyə uduzdu…
Bu sevgi bir qara qızdı,
Dərdi dəvədən böyükdü…

Məni bu gecənin

Məni bu gecənin ulduzundan as,
Qoy məni öldürsün gecə, İlahi.
Bircə gün səadət verməyən sevgi
Düz on il yaşadı necə, İlahi?..

Çiynimdə boy atdı, könlümə güldü,
Ömrümü pay verdim, günümə güldü;
Yol aldım səmtinə, yönümə güldü,
Mən varı endirdi heçə, İlahi..!

Tutub əllərindən yarayacaqdım,
Uşağının saçını darayacaqdım,
Mən onu qocaldıb qarıyacaqdım,
Günahım bilmirsən neçə, İlahi?..

Toy-büsat taleyim ürəyimdə yas,
Bu “ağgün”, bu qurban, bu da qızıl tas…
Gəl, məni gecənin ulduzundan as,
Qoy məni öldürsün gecə, İlahi..!

You may also like

Şərh yaz

Layihə haqqında

Sayt Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə hazırlanmışdır.

Saytın məzmunu

Saytın məzmunu DGTYB İctimai Birliyinin cavabdehliyindədir, bu baxımdan saytın məzmunu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin mövqeyini əks etdirmir.

Bizim Yazı ©2022 – Bütün hüquqları qorunur.