Yanvarın 25-də Sumqayıt Poeziya Evində tanınmış şair Zirəddin Qafarlının 70 illik yubileyi və yeni şeirlər kitabının təqdimatı münasibətilə tədbir keçirildi.
Bizimyazı.az xəbər verir ki, tədbirdə ziyalılar, poeziyasevərlər və şairin qələm dostları iştirak edirdi.
Mərasimi Poeziya Evinin rəhbəri şair İbrahim İlyaslı açaraq şairin ədəbiyyatımızdakı mövqeyini, yaradıcılıq özəlliklərini incələdi və Zirəddin Qafarlı imzasının çağdaş poeziyamızdakı rolundan danışdı.
Sumqayıt şəhər İcra Hakimiyətinin şöbə müdiri Fərman Kazımov Aparat adından yubilyarı təbrik edərək, Sumqayıt İB-nin hədiyyəsini ona təqdim etdi.
Azərbaycan Yazıçılar Birliyi adından “Ulduz” jurnalının şöbə müdiri, şair Dayandur Sevgin və AYB Sumqayıt Bölməsinin sədri, şair Gülnarə Cəmaləddin mənsub olduqları təşkilatın hədiyyəsini və xoş arzularını yubilyara çatdırdı.
Millət vəkili Aydın Hüseynov çıxışı zamanı Zirəddin Qafarlını uzun illər ərzində tanıdığını və onun yaradıcılığını diqqətlə izlədiyini vurğuladı.
“Tovuz Xeyriyyə Cəmiyyəti”nin sədr müavini, “Tərəqqi” medallı auditor Çingiz Abbasov Cəmiyyətin təsis etdiyi “Mikayıl Azaflı-100” medalını, Plaketi və şairin şeirlərindən ibarət “Ömrüm nağıl oldu” kitabını yubilyara təqdim etdi.
Sumqayıt şəhərinin ilk sakinlərindən olan, şair, Prezidentin Fərdi təqaüdçüsü Əşrəf Veysəlli, şairlərdən – Musa Ələkbərli, İslam Sadıq, Rəfail İncəyurd, Rafiq Yusifoğlu, Aləmzər Sadiqqızı, yubilyarın Moskvada – M.Qorki adına Dünya Ədəbiyyatı İnstitutunda tələbə yoldaşları olmuş Murad Köhnəqala və Nazim Əhmədli, Sumqayıt Teatrının aktyoru, Əməkdar artist İzaməddin Bağırov və başqaları çıxış edərək şairə ürək sözlərini çatdırdılar.
Aşıq Şəhriyar Qaraxanlının saz havası altında səsləndirdiyi Zirəddin Qafarlı şeirləri iştirakçıların böyük marağına səbəb oldu.
Sonda yubilyar məclis iştirakçılarına dərin təşəkkürünü bildirdi və onlara imzalı kitablarını hədiyyə etdi.
İradə Aytel/kultur.az
