Qürbət həyatı yaşayan Güneyli soydaşımızın romanı Bakıda çap olunub
Finlandiyada yaşayan azərbaycanlı yazıçı Güntay Gəncalpın Yağız qarışqalar” adlı romanı Bakıda “Alatoran yayınları” seriyasında çap olunub.
Artıq Bakıda 5-ci kitabı ilə oxucuların görüşünə gələn Güntay Gəncalp Güney Azərbaycanda yetişən ünlü çağdaş yazarlarımızdan biridir. Bu romanında o iddialı bir mövzuya toxunub: müəllifin düşüncəsinə görə “Yağız Qarışqalar” romanı Güney Azərbaycanın istiqlal kitabı olacaq. Romanın “anlatım” (“annotasiya”) bölümündə deyilir:
“Oğlumla ormanlıqda gəzirdik. Qarışqanı ilk dəfə olaraq görən oğlum “Ata bu nədir?” deyə sordu.
“O, qarışqadır, oğlum. Ana dilimizdə ona qarışqa deyirik” dedim. Gecələr yatdiğımızda qarışqalar haqqında ona nağıl söyləməmi istədi. Oğluma uydurub söylədiyim nağıl böyüyüb kiçik bir roman oldu”.
Sözdə uşaqlar üçün danışılmış bir hekayət adlandılrılsa da, roman çox ciddi bir mövzuya – İrandakı Azərbaycan türklərinin öz milli kimliklərini qorumaq uğrunda mübarizələrinə həsr edilib.
Kitabı “Akademiya kitab mərkəzi”, “Kitab evi”, “Əli və Nino” kitab satış mərkəzlərindən əldə etmək olar.
