Ana səhifə YAZILAR Günəş nurudur dövr eləyən damarımızda

Günəş nurudur dövr eləyən damarımızda

Müəllif: Bizim Yazı
1. 830 baxış

Rafiq ODAY

OLMAZ

Bir gün belə sənsizliyə, Ruhum, tabım olmaz,
İnnən belə bir ayrı sitəmkar tapım, olmaz!

Haqqa və mürüvvət deyilən ülvi məkana,
Girməkçün, inan, sevgidən özgə qapım olmaz.

İman işığı yollarıma nur ələməkdə,
Bu nurda durum öz yolumu mən sapım, olmaz.

Qəlblərdə barış saxlamağın fürsəti varkən,
Nifrət və ədavət toxumu mən səpim olmaz.

Ülfətdi, məhəbbətdi, inan, ali vəzifəm,
Bundan uca, bundan ötə bir mənsəbim olmaz.

Oday belə bir düstura qail ola bilməz –
Bu işmi ki, sən sevmə, amma mən sevim – olmaz!

ELƏ QOVDUM

Əymə başını sən kədərə, yar, elə qovdum,
Gəlməz bu könül gülşəninə sar, elə qovdum.

Hicran bizi ağlatmaq üçün gəldi də, amma,
Oldu özü aləmlər içrə xar, elə qovdum.

Çox söylədim, aşiqləri üzmə – bu günahdır,
Əl çək bu əməldən, bir utan, ar elə – qovdum.

Yaydı bütün ərşə xəbəri göydə mələklər,
Yəqin ki, sənin də xəbərin var, elə qovdum.

Düşməz ki, ələ bir belə imkan daha, yavrum,
Sən də sağına, həm soluna car elə – qovdum.

Gəldin, Odayın dünyasına nur ələdin sən,
Olmaz ta ona cümlə-cahan dar, elə qovdum.

HİCRAN MƏNƏ QALDI

Getdi yenə vüsal dəmi, hicran mənə qaldı,
Tərk etdi könül həmdəmi, hicran mənə qaldı.

Sanki yönünü tərsə salıb öz mayakından,
Dəryada üzən bir gəmi, hicran mənə qaldı.

Aləmlər içrə bir o idi zəndi-gümanım,
Güldürdü mənə el-aləmi, hicran mənə qaldı.

Heç bilməz idim bir belə sədd var aramızda,
Həm həmdəmi, həm də əmi, hicran mənə qaldı.

Eşqin əgər ortaq dili varsa bu cahanda,
Anla məni, ey əcəmi, hicran mənə qaldı.

Ruhum, bu bəşər içrə mənə düşdü ələmin,
Həm hasili, həm də cəmi, hicran mənə qaldı.

Oday, nə qədər həsrət olar bir ömür içrə,
Dəvət eləyər qəm-qəmi, hicran mənə qaldı.

DƏYİŞMƏZ

Haqqa yol alan səmtini hər yanə dəyişməz,
Eylər özünü şamına pərvanə, dəyişməz.

Dinclik nədi bilməz vətəni darda olanlar,
Cumar kişitək meydana mərdanə, dəyişməz.

Ərlər – nə sınar, nə əyilər düşmən önündə,
Bağrın başını eyləyələr şanə, dəyişməz.

Günəş nurudur dövr eləyən damarımızda,
Oddan törəyən qanını hər qanə dəyişməz.

Bu çərxi-fələk tərsinə dövran eləməkdə,
Yoxsa arada bir belə fərq, anə dəyişməz.

Azmı dəyişən xislətini min kərə gündə,
Fəxr eylə, Oday, əsla ki, Fərqanə dəyişməz!

 

You may also like

2 şərh

Emil Rasimoğlu 2013-06-21 - 21:55

Təbrik edirəm Rafiq müəllim.Çox yüksək poetik ifadələrlə zəngin fikirləriniz var.Yeni yaradıcılıq uğurları arzulayıram.

Cavab
[email protected] 2013-08-21 - 16:10

Təşəkkür edirəm, Emil bəy, diqqətə görə.

Cavab

Emil Rasimoğlu üçün bir cavab yazın Cavabı ləğv edin

Layihə haqqında

Sayt Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə hazırlanmışdır.

Saytın məzmunu

 

Saytın məzmunu DGTYB İctimai Birliyinin cavabdehliyindədir, bu baxımdan saytın məzmunu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin mövqeyini əks etdirmir.

Bizim Yazı ©2022 – Bütün hüquqları qorunur.